१९ वर्षपछि लालीगुराँसलाई त्रिवेणी कप

लमजुङ । लालीगुराँस युवा क्लब भुजुङले त्रिवेणी कपको ३१ औं संस्करणको उपाधि जितेको छ।

लमजुङको बेसीसहरस्थित सहजी खेलमैदानमा शनिबार सम्पन्न फाइनलमा लालिगुराँसले बेसीसहर युथ सोसाइटीलाई १–० गोलअन्तरले हराउँदै उपाधि जितेको हो।

यससँगै लालीगुराँसले १९ वर्षपछि त्रिवेणी कपको उपाधि उचाल्यो। यसअघि लालीगुराँसले २०६१ मा आयोजना गरिएको त्रिवेणी कप जितेको थियो। लालीगुराँसले कपसँगै नगद आठ लाख रुपैयाँ प्राप्त गर्‍यो।

बेसीसहर युथ सोसाइटीका विदेशी खेलाडी आन्द्रेस नियाले खेलको ५९औं मिनेटमा गरेको आत्मघाती गोलले लालीगुराँसको भाग्य चम्किएको हो। लालीगुराँसका खेलाडीले हानेको बल फर्काउने क्रममा नियाको हेडरले आफ्नै गोल पोस्टको जाली चुमेपछि बेसीसहर युथ सोसाइटी उपविजेतामा सीमित बन्न बाध्य भयो। उपविजेताले चार लाख रुपैयाँमा चित्त बुझायो।