पाल्पामा आफैँले बोकेको भरुवा बन्दुक पड्किँदा एक जनाको मृत्यु

पाल्पा, मंसिर २४ । पाल्पामा आफैले बोकेका भरुवा बन्दुक पड्किएर एक जनाको मृत्यु भएको छ ।

निस्दी गाउँपालिका वडा नं ४ मित्याल गाङ्सिङ डाँडाका ४८ वर्षीय डम्बरबहादुर सारुको आफैले बोकेको बन्दुक पड्किएर मृत्यु भएको जिल्ला प्रहरी कार्यालय पाल्पाले जनाएको छ । प्रहरीका अनुसार घटनास्थलबाट एक नाले भरुवा बन्दुक र भिर्ने झोला बरामद गरिएको थियो ।

रातको समयमा फापर खान आएको जङ्गली जनावर दुम्सीलाई मार्न हिडेका सारु बाटोमा चिप्लिएर आफैले बोकेको बन्दुक पड्किँदा घाइते भएका थिए । घाइते भएका उनलाई उपचारका लागि रामपुर अस्पताल पाल्पा लगिएकोमा राती ३ बजेर २० मिनेटमा अस्पतालले मृत घोषणा गरेको थियो ।

घटनाबारे थप अनुसन्धान भइरहेको प्रहरीले जनाएको छ ।