डोल्पामा नेपाली सेनाका गुल्मपति सम्पर्कविहीन

काठमाडौं, भदौ ११ । डोल्पा सदरमुकाम दुनैमा रहेको नेपाली सेनाको नन्द बक्स गुल्मका प्रमुख विमल पण्डित सम्पर्कविहीन भएका छन् ।

आइतबार साँझ ७ बजेदेखि उनी सम्पर्कविहीन भएको डोल्पाका प्रमुख जिल्ला अधिकारी भूमिश्वर पोखरेलले जानकारी दिए । उनका अनुसार बडीगार्डसमेत छाडेर सम्पर्कविहीन भएपछि शंका लागेर गुल्मपति पण्डितको खोजीकार्य गरिएको छ ।

‘उहाँले बडीगार्ड पनि छाडेर हिँड्नुभएको रहेछ । अहिलेसम्म पनि सम्पर्कमा आउनुभएको छैन,’ प्रजिअ पोखरेलले भने, ‘बडीगार्ड पनि नलगेपछि शंका लागेर खोज्न पठाएको छु ।’

गुल्मपति पण्डितको खोजीमा डिएसपी शिवकुमार बुढाथोकीको कमान्डमा प्रहरी परिचालन गरिएको छ ।