आँखा पाक्ने रोगको संक्रमण फैलिएपछि भरतपुर महानगर भित्रका विद्यालयहरु पाँच दिन बन्द

चितवन, साउन २१ । आँखा पाक्ने रोगको संक्रमण फैलिएपछि चितवनको भरतपुर महानगरपालिकाका विद्यालयहरु पाँच दिनका लागि बन्द गरिएको छ ।

भरतपुर महानगरपालिकाले आज एक सूचना सार्वजनिक गर्दै सबै सामुदायिक र संस्थागत विद्यालयहरु बिदा गरेको जानकारी दिएको हो । सूचनामा हिउँदे र वर्षे बिदाबाट मिलान गर्ने गरी भोलि सोमबार २२ गतेबाट २६ गतेसम्म  सबै विद्यालय बन्द गरिएको उल्लेख गरिएको छ ।

विद्यालयमा एडिनो भाइरसको संक्रमण फैलँदै गएकोले बन्द गर्नु परेको महानगरपालिकाले जनाएको छ ।