पटक-पटक विरामी मर्ने भरतपुरको पुरानो मेडिकल कलेजमा पैसामा मिलाउने घटना, प्रहरी र जिल्ला प्रशासन बेखबर

चितवन, साउन १३ । भरतपुरको पुरानो मेडिकल कलेजमा उपचारका क्रममा विरामीको मृत्यु भएका घटना पटक–पटक बाहिर आउने गर्छन् । घटनाको विषय कलेजले सार्वजनिक पनि गर्दैन । केहि दिनअघि उपचारका क्रममा खैरहनी नगरपालिका–१० बडगाउँकी ३२ वर्षीया शर्मिला हटवाल उप्रेतीको उपचारको क्रममा मृत्यु भयो ।

कलेज र चिकित्सकको लापरबाहीका कारण विरामीको मृत्यु भएको भन्दै विरामीका आफन्तले तोडफोड र आन्दोलन गर्ने गर्छन् । ती घटनाहरु कलेजले भित्रभित्रै मिलाउने गरेको छ । मृतकका आफन्तले चिकित्सकको लापरबाहीका कारण विरामीको ज्यान गएको आरोप लगाउँदै अस्पताल घेराउ गरे । अस्पताल र पिडित पक्षबीच सहमति भएपछि मृतकका आफन्तले शव बुझे । सहमतिको विषयमा पनि कलेजले आधिकारीक रुपमा सार्वजनिक गरेन ।

खैरहनी–१० का वडाध्यक्ष चन्द्रविक्रम चौधरीका अनुसार महिलाको उपचारमा लागेको खर्च सम्पूर्ण मिनाहा गर्ने, घटनाको छानबिन समिति बनाएर अनुसन्धान गर्ने, अनुसन्धानको क्रममा अस्पताल पक्ष दोषी ठहर भए कानुनबमोजिम कारबाही गर्ने, दोषी ठहर नभए पनि सामाजिक उत्तरदायित्व सम्झेर महिलाका दुई बच्चालाई अक्षयकोष खडा गरेर कक्षा १२ सम्म पठनपाठन गरिदिने सहमति भयो  ।