कपिलवस्तुको सिसवा गाउँमा आगलागीबाट २६ ओटा घरगोठ जलेर नष्ट
नन्द किशोर कुर्मी
विजयनगर, वैशाख ७ । कपिलवस्तुको विजयनगर गाउँपालिकामा आगलागी हुँदा अन्दाजी एक करोड बढी रुपैयाँ बराबरको क्षति भएको छ । गाउँपालिकाको वडा नम्बर ५ सिसवामा आगलागी भएको प्रहरीले जनाएको छ ।
फुसको ९ ओटा घर पूर्ण रुपमा र १७ ओटा आंशिक गरि २६ ओटा घरगोठ जलेर नष्ट भएको इलाका प्रहरी कार्यालय गणेशपुरले जनाएको छ । बिहिबार करिब साढे ११ बजेतिर लागेको आगोले खाद्यान्न, लत्ताकपडा, कागजपत्र लगायतको सामग्री जलेर नष्ट भएको प्रहरी निरीक्षक कृष्ण रानाले जानकारी दिए ।
आगलागीमा परि १ एउटा पाडो जलेर मरेको उनले बताए । मानवीय क्षति नभएको प्रहरी निरीक्षक रानाले बताए । आगलागीको कारण खुल्न नसकेको उनले बताए । शिवराज नगरपालिका, कृष्णनगर नगरपालिका, प्रहरी, सशस्त्र प्रहरी, जनप्रतिनिधि र स्थानीयको सहयोगमा ३ घण्टापछि आगो नियन्त्रण आएको हो ।
विजयनगर गाउँपालिका अध्यक्ष गोपाल बहादुर थापाले तत्कालका लागि आगलागी पिडितलाई राहतको लागि प्रतिघरलाई ५० किलो दरले चमाल, दाल, तेल, मसला लगायत आवश्यक खाद्यान्न सामग्री उपलब्ध गराउने बताएका छन् ।
