प्रेमप्रसाद आचार्यलाई न्याय माग्दै माइतीघर मण्डलामा प्रदर्शन (तस्बिरहरू)
काठमाडौं, माघ ११ । काठमाडौंको नयाँ बानेश्वरस्थित संसद भवन अगाडि मंगलबार आत्मदाह गरेका इलामका प्रेमप्रसाद आचार्यलाई न्याय माग गर्दै युवाहरूले प्रदर्शन गरेका छन् । बुधबार दिउँसो युवाहरूले माइतीघर मण्डलमा आचार्यको न्यायका लागि प्रदर्शन गरेका हुन् ।
उनीहरू माइतीघरबाट प्रदर्शन गर्दै बानेश्वरतर्फ गएका थिए । उनीहरूले बानेश्वरमा मौन धारण गर्दै आचार्यलाई श्रद्धाञ्जलीसमेत दिएका छन् । उनको आत्मदाह पछाडी रहेको आर्थिक, सामाजिक, राजनीतिक कारणको पहिचान गर्नुपर्ने प्रदर्शनकारीको माग छ ।
देशमा केही गर्ने भन्नेका लागि उपयुक्त वातावरण बनाउन, आवश्यक नीति निर्माण गर्न, भ्रष्टाचारविरूद्ध कडा कानुनको निर्माण गर्न लगायतका मागसहित प्रदर्शन भएको थियो । आचार्यको आत्मदाहमा राज्य जिम्मेवार भएको भन्दै युवाहरूले ‘अब अर्को श्रद्धाञ्जली मेरो लागि नहोस् !’ भन्दै सचेतसमेत गराएका छन् ।
आचार्यको उपचारका क्रममा बुधबार बिहान मृत्यु भएको थियो ।
