झापामा छोराले चलाएको मोटरसाइकलबाट खसेर आमाको मृत्यु

झापा, साउन २२ । झापामा छोराले चलाएको मोटरसाइकलबाट खसेर आमाको मृत्यु भएको छ ।

आइतबार साँझ अर्जुनधारा नगरपालिकाको नारायण चोक र बुद्धशान्ति गाउँपालिकाको जयपुर चोक जोड्ने सडकखण्डमा अर्जुनधारा नारायण चोककी ६२ वर्षीया लक्ष्मीमाया कार्कीको छोरा सुमन कार्कीले चलाएको मोटरसाइकलबाट खसेर मृत्यु भएको हो ।

जिल्ला प्रहरी कार्यालय झापाका अनुसार उनी मोटरसाइकलको पछाडि बसेकी थिइन् । सुमनले सडकमा भएको खाल्डोबाट मोटरसाइकल जोगाउन खोज्दा पछाडि बसेकी आमा लक्ष्मीमाया खसेकी हुन् । उनको टाउकोमा गम्भीर चोट लागेको थियो ।

उपचारका लागि बिर्तामोड ल्याउँदै गर्दा लक्ष्मीमायाको बाटोमै मृत्यु भएको जिल्ला प्रहरी कार्यालय झापाले जनाएको छ । घटनापछि छोरा सुमन पनि अचेत अवस्थामा छन् । उनको बिएन्डसी अस्पतालमा उपचार भइरहेको प्रहरीले जनाएको छ ।