रुकुम पश्चिममा अरिँगालको टोकाइबाट एक जनाको मृत्यु

रुकुम पश्चिम, श्रावण २२ । रुकुम पश्चिममा अरिँगालको टोकाइबाट एक पुरुषको मृत्यु भएको छ । जिल्लाको त्रिवेणी गाउँपालिका–१ का ४० वर्षीय सुवर्ण सुनारको अरिँगालको टोकाइबाट मृत्यु भएको हो ।

तीन दिन अघि अरिंगालको टोकाइबाट बिरामी भएका सुनारको झुल्नेटास्थित निजी स्वास्थ्य संस्थामा उपचार गर्दा निको नभएपछि आइतबार नेपालगन्ज लैजाँदै गर्दा सल्यानको श्रीनगरमा मृत्यु भएको गाउँ खेलकुद विकास समिति त्रिवेणीका अध्यक्ष जनककुमार विश्वकर्माले जानकारी दिए ।

साथीहरूसँगै सल्यानको बाँफुखोलामा अरिँगाल झार्न भनी गएका सुनारलाई अरिंगालले टोकेको थियो । उनको शरीरमा ५३ वटा घाउ देखिएको छ । मृतक सुनार गाउँ खेलकुद विकास समिति त्रिवेणीका सचिवसमेत थिए ।