निउरो टिपेर घर फर्किने क्रममा खोलाले बगाएर एकको मृत्यु, एक जना बेपत्ता

बुटवल, साउन १७ । कपिलवस्तुको वाणगंगा नगरपालिकास्थित कोइली नदीले बगाएर एक जनाको मृत्यु भएको छ भने एक जना अझै बेपत्ता छन् ।

अविरल वर्षासँगै खोलामा आएको बाढीले एक दम्पतीलाई बगाएर बेपत्ता बनाएको थियो । बेपत्ता भएका दुई जनामध्ये श्रीमतीको शव फेला परे पनि श्रीमान भने बेपत्ता रहेको प्रहरीले जनाएको छ । प्रहरीका अनुसार मंगलबार बिहान वाणगंगा नगरपालिका वडा नं.९ को स्थित मा कोइली नदीले वाणगंगा – ७ निवासी वीर बहादुर सुनार, उनकी श्रीमती लक्ष्मी सुनार र निजहरूको छोरा निरज सुनारलाई बगाएको हो ।

निरजलाई स्थानीयले देखेर खोलाबाट सकुशल उद्धार गरे पनि वीरबहादुर र लक्ष्मीलाई बगाएको इलाका प्रहरी कार्यालय पिपराले जनाएको छ । लक्ष्मीको शव बगेको ठाउँभन्दा एक किलोमिटर तल भेटिएको थियो । मंगलबार बिहान जंगलमा निउरो टिप्न गएका उनीहरू घर फर्किने क्रममा खोला तर्दा बाढीले बगाएको हो ।

अहिले इलाका प्रहरी कार्यालय पिपरा, सशस्त्र प्रहरी बल पिपरा र इलाका प्रशासन कार्यालय वाणगंगाको एक विशेष टोलीले वीर बहादुरको खोजी कार्य गरिरहेको जनाएको छ ।