सर्लाहीमा करेन्ट लागेर एक मजदुरको मृत्यु, एक घाइते

सर्लाही, माघ २९ । सर्लाहीको बागमती नगरपालिका–२, धरहरामा शनिबार करेन्ट लागेर एक मजदुरको मृत्यु भएको छ, भने एक जना घाइते भएका छन् ।

शनिबार बिहान १०ः३० बजेतिर धरहराका स्थानीय कुमार परियारको घरको छत ढलानको लागि रड सेटिङ गर्ने क्रममा बिजुलीको तारमा रडले छुदा सोही नगरपालिका–८, खजुरेका २५ वर्षीय रामु महतोलाई करेन्ट लागेको हो ।

करेन्ट लागेर गम्भीर घाइते भएका महतोलाई उपचारका लागि हरिवनस्थित जीवन अस्पताल पुल्याउदा चिकित्सकले मृत घोषणा गरेको इलाका प्रहरी कार्यालय हरिवनले जनाएको छ ।

यसैगरी महतोलाई बचाउने क्रममा घाइते भएका अर्का मजदुर सोही स्थानकै २१ वर्षीय दीपक कुमार महतोको उपचार भइरहेको छ । घाइते दीपकको अवस्था भने सामान्य रहेको प्रहरीले जनाएको छ ।