जसपा लुम्बिनीले सोध्यो सांसद अम्बिका काफ्लेलाई स्पष्टीकरण

दाङ। जनता समाजवादी पार्टी नेपाल, लुम्बिनी प्रदेश सभा संसदीय दलले प्रदेश सभा सदस्य अम्बिका काफ्लेलाई स्पष्टीकरण सोधेको छ ।संसदीय दलको निर्णय र ह्वीपविपरीत मुख्यमन्त्री चेतनारायण आचार्यले मागेको विश्वासको मतको पक्षमा मतदान नगरेको भन्दै दलले काफ्लेलाई तीन दिनभित्र लिखित स्पष्टीकरण दिन निर्देशन दिएको हो ।

संसदीय दलका नेता सन्तोषकुमार पाण्डेले काफ्लेलाई स्पष्टीकरण सोधेका हुन् । पत्रमा भदौ १ गते प्रदेश सभामा भएको मुख्यमन्त्री आचार्यको विश्वासको मतसम्बन्धी प्रस्तावमा जसपा नेपाल लुम्बिनी प्रदेश सभा संसदीय दलले पक्षमा मतदान गर्ने निर्णय गरेको र सोहीअनुसार ह्वीप जारी गरेको उल्लेख छ । दलको निर्णय र निर्देशनविपरीत कार्य गरेको भन्दै संसदीय दलले काफ्लेसँग तीनवटा प्रश्नको जवाफ मागेको छ ।

काफ्ले जसपा नेपाल लुम्बिनी प्रदेश सभा संसदीय दलको सदस्य भए नभएको, राजनीतिक दलसम्बन्धी ऐन, २०७३ बमोजिम दलले जारी गरेको निर्देशन पालना नगर्नुको कारण र दलको निर्देशन पालना गर्नु आफ्नो दायित्व भए नभएकोबारे स्पष्टीकरण मागिएको छ । मुख्यमन्त्री आचार्यले भदौ १ गते प्रदेश सभाबाट विश्वासको मत लिँदा उनको पक्षमा ४५ र विपक्षमा २६ मत परेको थियो । जसपा नेपालले सरकारको पक्षमा मतदान गर्ने निर्णय गरेको थियो ।