शाहलाई जिताउन कांग्रेसीहरु एकजुट

कपिलवस्तु — नेपाली कांग्रेस कपिलवस्तु क्षेत्र नं. ३ का प्रतिनिधिसभा सदस्य उम्मेदवार अभिषेक प्रताप शाहलाई जिताउन पार्टी पंक्ति पूर्ण रूपमा एकजुट भएको छ । केन्द्रीय नेतादेखि जिल्ला र क्षेत्रीय तहसम्मका नेता–कार्यकर्ताहरू अहिले चुनावी अभियानमा सक्रिय रूपमा होमिएका छन् । पूर्व केन्द्रीय सदस्य तथा पूर्वमन्त्री रुपा विकले लोकतन्त्रको सुदृढीकरण र क्षेत्रको समग्र विकासका लागि शाहलाई विजयी गराउन आवश्यक रहेको बताइन् ।

“कपिलवस्तु–३ को विकास, शिक्षा, स्वास्थ्य र पूर्वाधार विस्तारका लागि सक्षम र सक्रिय नेतृत्व चाहिन्छ, त्यो क्षमता अभिषेक शाहमा छ,” उनले भनिन् । नेपाली कांग्रेस कपिलवस्तुका जिल्ला सभापति अब्दुल कलामले पार्टीभित्र कुनै प्रकारको अन्तरविरोध नरहेको दाबी गर्दै सबै कार्यकर्ता चुनाव केन्द्रित भएको बताए । “यो निर्वाचन केवल उम्मेदवारको जित–हारको विषय होइन, यो लोकतान्त्रिक मूल्य र विकासको दिशाको निर्णय हो,” उनले भने । जिल्ला उपसभापति हुमकान्त खनालले क्षेत्र नं. ३ मा कांग्रेसको मजबुत संगठन र जनसमर्थन रहेको उल्लेख गर्दै शाहको जित सुनिश्चित रहेको दाबी गरे । जिल्ला सचिव प्रेम बहादुर रायमाझीले गाउँ–गाउँमा घरदैलो कार्यक्रम तीव्र पारिएको जानकारी दिए ।

क्षेत्रीय सभापति ब्रम्हानन्द उपाध्यायले कांग्रेसको एजेण्डा जनताको पक्षमा केन्द्रित रहेको बताउँदै भने, “हामी विकास, सुशासन र पारदर्शिताको पक्षमा छौं । शाहलाई जिताउनु भनेको स्थिर र जिम्मेवार नेतृत्व चयन गर्नु हो ।” कांग्रेस नेता रजत प्रताप शाहले युवापुस्ताको आकांक्षा सम्बोधन गर्न शाह सक्षम उम्मेदवार भएको बताए । अर्का क्षेत्रीय सभापति गोविन्द केसीले पार्टी एकताबद्ध भएर निर्वाचनमा होमिएको उल्लेख गरे । नेता मुक्तेश्वर मिश्रले कांग्रेस नेतृत्वमा मात्रै समावेशी र दिगो विकास सम्भव रहेको बताए भने रफिक मुसलमानले अल्पसंख्यक र पिछडिएको समुदायको आवाज संसदमा पु¥याउन शाह उपयुक्त रहेको धारणा राखे ।

त्यसैगरी बिनय गिरी, केशब पाण्डे, विनोद नेपालले कांग्रेसको जित क्षेत्रको समृद्धिसँग जोडिएको बताए । युवा नेता राकेश रायमाझीले युवालाई रोजगारी, सीप र अवसर सिर्जना गर्ने प्रतिबद्धता व्यक्त गरे । नेता अमर पौडेलले विकासका अधुरा योजना पूरा गर्न शाहको जित अपरिहार्य रहेको बताए । नेत्री शुशिला बेल्बासेले महिला सशक्तीकरण र सामाजिक न्यायका लागि कांग्रेसको जित आवश्यक रहेको उल्लेख गरिन् । यस्तै, नेत्री ज्योती मगरले पनि लोकतन्त्र र विकासको पक्षमा शाहलाई समर्थन रहेको बताइन् । कांग्रेस नेताहरूले चुनावी अभियानलाई थप सशक्त बनाउँदै घरदैलो, कोणसभा र भेटघाट कार्यक्रमलाई तीव्रता दिएका छन् । पार्टी पंक्तिको दाबी छ—एकताबद्ध कांग्रेस र जनताको साथले कपिलवस्तु क्षेत्र नं. ३ मा अभिषेक प्रताप शाहको जित सुनिश्चित छ ।