बिहार निर्वाचनमा हारपछि कांग्रेसको समीक्षा बैठक, धाँधलीको आरोप
नयाँ दिल्ली । बिहार विधानसभा चुनावमा पार्टीले नराम्रो हार बेहोरेपछि भारतीय राष्ट्रिय कांग्रेसले शनिबार दिल्लीमा पहिलो समीक्षा बैठक बोलाएको छ ।
बैठकपछि कांग्रेसका नेताहरूले भाजपामाथि चुनावमा धाँधली गरेको आरोप लगाएका छन् । कांग्रेस नेता केसी वेणुगोपालले पार्टीले धाँधलीका प्रमाणहरू संकलन गरिरहेको र आगामी दुई हप्ताभित्र देशसामु सार्वजनिक गर्ने बताएका छन् ।
कांग्रेस अध्यक्ष मल्लिकार्जुन खड्गेसँगको भेटपछि पार्टीका वरिष्ठ नेता अजय माकनले बिहार चुनावको नतिजाबारे गम्भीर प्रश्न उठाएका छन् । उनले भने, ‘चुनाव प्रक्रियामा सुरुदेखि नै प्रश्न उठेका छन्, त्यसैले यस्ता नतिजा अचम्म लाग्ने खालका छन् । कांग्रेसलाई सन् १९८४ मा पनि यस्तो स्ट्राइक रेट मिलेको थिएन, जस्तो यसपटक भाजपालाई मिलेको छ । केही न केही गडबडी पक्कै छ । हाम्रा कार्यकर्ताहरूले लगातार धेरै ठाउँमा गडबडी भएको बताइरहेका छन् ।’
माकनका अनुसार गठबन्धनका सबै दलहरूले यो नतिजालाई ‘अप्रत्याशित’ मानेका छन् र यसको छानबिनको माग गरिरहेका छन् ।
